Деновиве до Бигорскиот манастир секојдневно пристигнуваат вести околу најновите случувања во врска со тоа дали треба да се даде можност за богослужба на албански јазик, како и за потеклото на Горнореканците и на Долнореканците.
Би сакале да напомнеме дека братството на Бигорскиот манастир пред сѐ ја цени слободата што му е дадена на секој човек од Бога, но потсетуваме дека никаква цел не може да ја оправда злоупотребата на таа слобода!
Така, без пристрасност или завземање на страна, би направиле само кратка анализа околу тоа дали САС на МПЦ би требало да дава „бланко“ дозволи, без да се испита внимателно кој всушност бара богослужба, или во случајов панихида, и со каква цел. Притоа би го споредиле ова со денешнава изјава на поглаварот на ИВЗ дека наводно во нашата земја постојат македонци хибриди, или како што тој прецизно се изрази, ин-витро македонци, па дури и сатанизирани!
Освен тоа, ќе нагласиме, во духот на демократијата и спомнатата слобода, дека иако сме на мислење дека крвното потекло е она што не определува, односно ни го дава генот, оставаме простор одредени личности со текот на времето еднаш, па и двапати, поинаку национално да се изјаснат, што би можело да се оправда и со тековната животна ситуација во која се наоѓаат. А во врска со промената на верата, сега или во минатото, тука не би додале ништо, бидејќи секој ја донел таа одлука поттикнат од извесни околности, без разлика дали станува збор за некакви притисоци во кои се нашол, или е тоа резултат на неговиот светоглед!
Така, во контекст на гореспомнатото го пренесуваме во целост Барањето за демант упатено до нас од страна на здружението „Мавровско-горнорекански регион“ во кое тие јасно и гласно, цврсто и недвосмислено кажуваат и укажуваат дека во споменатиов случај САС на МПЦ е погрешно информиран, дека нема Албанци меѓу Горнореканците, односно и да ги има, тие се само неколку поединци на број, па според тоа не би требало да се дозволи панихида за Кристо Багери на албански јазик. Во врска со ова, во медиумите веќе е објавена вест со изјава на потомците од семејството Багери дека ни тие самите не би сакале панихидата за нивниот покоен предок да биде отслужена на албански јазик, туку напротив, и дека таквото барање доаѓа од надворешни елементи, а не од локалното население. Поради тоа, како заклучок, Здружението го изнесуваат своето барање одлуката на САС на МПЦ да биде поништена!
Почитувани!
По повод донесувањето на контраверзната и штетна одлука на синодот на МПЦ-ОА ние членовите и симпатизерите на здружението „Мавровско-горнорекански регион“, Ве замолуваме и воедно бараме од Вас да биде објавен овој наш демант за кој писмено Ве известуваме и Ве информираме дека на територијата на Општина Маврово и Ростуша не постојат Албански Православни населени места, освен неколку издвоени случаеви на поединци за кои според нашите сознанија и видувања се прикажуваат таканаречени „Православни албанци“ иако ние како здружение ја знаеме причината за нивното изјаснување но ги почитуваме нивните чувства.
Здружението со целосна морална обврска и аргументирано ги набројува само неколку причини од многу кои ги има на оваа територија дека одлуката на Синодот на МПЦ дека треба да биде повлечена или прогласена за ништовна.
Како аргументи ги наведуваме:
– Пописите кои се периодично евидентирани во Заводот за Статистика заклучно од 1945 година па се до денес, населението од Маврово и Горна река од православна вероисповест се изјаснуваат како Македонци со мајчин јазик Македонски.
– Фреските и иконите како и записите кои се врежани во иконостасите на манастирите и црквите во овој регион, се на старословенски и македонски јазик, но не и на албански јазик.
– Меѓусебната Кореспонденција во населените места и црковните служители на оваа територија во минатото била исклучиво на старословенски јазик, има примероци на руски јазик, мал дел и на грчки јазик, во поновите светилишта на Македонски јазик, но никаде и никогаш на албански јазик.
– Напоменуваме и не криеме дека постарите генерации на македонците од овој регион, под жесток притисок и терор го имаат користено албанскиот јазик како средство за опстанок и спас од пљачкање и убивање од страна на качачките банди.
– Исто така сакаме да напоменеме дека и првиот поглавар на МПЦ Г.Г Доситеј а кој е со потекло од овој регион како и многу други познати и истакнати личности, од овој регион никогаш и никаде не се изјасниле како албанци православни.
– Ние од Здружението никогаш нема да дозволиме да манастирот свети Јован Крстител-Бигорски да биде прогласен за седиште на албанското православие.
Здружението апелира до сите невладини организации и здруженија на албанците во западна Македонија, и на дел од актуелните политичари кои ја шират големо-албанската теза и пропаганда, да размислат дека не треба во 21 век да се прави обид за асимилирање на чистото македонско православно население кое долги години има соживот и хармонија со соседското албанско и македонско муслиманско население во нашата заедничка Река.
Здружението Мавровско-Горнорекански регион, го повикува надлежниот Владика од тетовско-гостиварската епархија Г.Јосиф, да ги повика потомците на Јосиф Багери, и во нивна консултација нека одржи панихида на јазикот што тие сами ќе одлучат.
На крајот апелираме до сите надлежни институции да ни дадат поддршка и разбирање за нашето барање до Синодот на МПЦ-ОА.
Со почит
Здружение „Мавровско-рекански регион“
