Вчеравечер, срцето на градот Кичево пулсираше во духот на Божикната радост и љубов, кога нашиот возљубен Старец, Епископот Антаниски г. Партениј, го посети празничниот базар. Во атмосфера исполнета со празнична топлина, музика и светлина, градот стана сведок на исклучително срдечна средба помеѓу нашиот пастир и верниот народ.
Огромната толпа присутни, меѓу кои најбројни беа децата и младите, со голема љубов и почит го пречекаа Старецот, кој, како и секогаш, ги даруваше своите топли зборови на утеха и благослов. Погледите на најмладите беа насочени кон божикните подароци што Владиката ги подели со неизмерна љубов, при што нивната детска радост и насмевки беа најубавото сведоштво за убавината на празникот.
Дедо Партениј, познат по својата татковска грижа и широка љубов кон луѓето, се задржа да разговара со многумина од присутните, споделувајќи ја радоста од Христовото Раѓање. Празничниот амбиент беше не само еден весел настан, туку и вистинско доживување на заедничката радост во новородениот Цар, момент на заедништво и на благодарност кон Бога.
Овој настан уште еднаш потсети на вечната порака на Божик: Христос дојде во светот, за да ја осветли темнината со Својата љубов и да го обедини човештвото во заедничка радост. Божикниот базар во Кичево, збогатен со присуството на нашиот Старец, стана живо сведоштво за оваа благодатна реалност.
Од името на благоверните кичевчани се обрати г. Бошко Сарафилоски, кој воедно го повика Старецот да го поздрави и благослови насобраниот народ:
„Почитувани сограѓани,
Во духот на големиот христијански празник Рождество Христово што деновиве го живееме и достојно и со многу настани го прославуваме, сакам во навечерието на уште еден голем празник, а тоа е споменот на првиот маченик кој пострада заради Христа, Архиѓаконот Стефан, да се потсетиме на неговиот подвиг, неговата љубов и неговата грижа за сите оние што во тоа време биле осамени, заборавени од општеството и од своите ближни. Имено, Архиѓаконот Стефан, со силата на Светиот Дух Кој дејствувал преку него, не само што им помагал, не само што ги хранел и ги згрижувал, туку и ги поучувал сите на љубовта Божја. Му нанесувале многу неправди, зло, клевети, но тој продолжувал да се грижи за децата, вдовиците, сираците и сиромашните, не штедејќи се ни најмалку. Секој што му пристапувал, во него наоѓал утеха, бидејќи ја препознавал љубовта, кроткоста и смирението што извирале од него.
Семилостивиот Бог преку Богомладенецот Христос, Неговата Пресвета Мајка и Божјите угодници, кои Самиот Бог ги прославил низ историјата, постојано се грижи за нас, Христијаните, но и воопшто, за сите луѓе. Постојано ни испраќа некој, што Му е верен пријател, преку кого Он дејствува, утешува, поучува. И денес имаме такви луѓе. Луѓе кои го препознале повикот и станале пријатели Божји, па тргнале по патот Христов колку и да е тежок, тесен и трнлив. Тука се за да нè сослушаат, прифатат и утешат. Некои не веруваат дека постојат такви луѓе, но јас ве уверувам дека има. Вечерва, впрочем, овде помеѓу нас е еден од тие луѓе коишто го препознале и прифатиле тој повик од Бога и еве веќе повеќе од триесет години, неуморно работи на нивата Господова, оставајќи безброј дела зад себе. И многумина сакаат да се претстават како татковци на градот, но само еден го заслужува тој епитет, а тоа е нашиот возљубен татко и владика, епископот Антаниски г. Партениј, кој со својата љубов, пожртвуваност и грижа за нас, кичевчани, навистина го заслужува тоа.
Возљубен наш владико бидете ни здрав и жив уште долго време и водете нè по патот на спасението, кон Царството небесно.
Христос се роди!“
Обраќајќи се во продолжение кон насобраниот народ, владиката г. Партениј со топли и едноставни зборови уште еднаш ја истакна суштината на таа Божикната порака:
„Христос се роди!
Возљубени мои,
Добра вечер на сите вас! Радоста што ја чувствувам, гледајќи ве собрани во толку голем број е навистина неискажлива. Пред нас симболично е претставена Витлеемската пештера – местото каде што се роди нашиот Спасител Христос. Но, таа пештера не е само историски момент; таа е духовна реалност што се одвива во срцата на луѓето. Секое срце, мили мои, е повикано да стане витлеемска пештера, место каде што ќе се роди Бог.
Денес, гледајќи ги вашите озарени лица, јас Го гледам Христа во вашите срца. Зашто сите ние, крстени во Неговото име, се нарекуваме Христијани – најважното именување што можеме да го носиме. Тоа име ни открива не само кои сме, туку и Кому Му припаѓаме и Кого сме повикани да Го сведочиме.
Ангелите во таа прва, свештена ноќ ја воспеаја најдлабоката вистина: „Слава на Бога во висините“. Христос, Синот и Словото Божјо, славен од ангелите на Небото, слезе на Земјата за да нè спаси. Тогаш ангелските воинства продолжија: „На земјата мир, меѓу луѓето добра волја“. Тоа ни ја открива суштината на Неговото доаѓање – да ни подари мир што не е од овој свет, мир што само Бог може да го дарува.
Но, возљубени, тој мир треба најпрво да се всели во нашите срца. Само тогаш ќе можеме да го пренесуваме и на другите. Тоа е нашата цел како Христијани – преку смирението да го стекнеме Божјиот мир и да го даруваме на светот. Денес, повеќе од кога било, мирот е насушно потребен.
Гледаме дека живееме во свет исполнет со војни и раздори. Фала Му на Бога, нашата земја живее во мир. Затоа да Го молиме Него, родениот во Витлеем, да го испрати Својот мир и таму каде што денес се војува – без разлика дали станува збор за Христијани или за иноверни. Зашто мирот е дар што им е потребен на сите луѓе, без разлика на религија и на народност.
Нека ве благослови Господ и нека идната година нè собере во уште поголем број, во љубов, мир и едномислие.
Христос се роди! Честит празник!“
Благодарност до Давор, Порта.мк и Јован Ангелески што ги овозможија овие прекрасни фотографии од случувањето на Божикниот базар во Кичево.
