Во чест на големиот македонски празник Илинден, традиционалната коњаница „Патот на Црешовото топче“ повторно го направи својот годишен поход до Свештената Бигорска Обител. И оваа година, по петнаесетти пат, Бигорски беше домаќин на илинденската манифестација „Бигорски Манастир – Патот на Црешовото топче“.
Со благослов на нашиот старец и игумен, Епископ Антаниски г. Партениј, група млади родољубиви комити, синоќа пристигнаа во Манастирот. Овие храбри млади луѓе, облечени во традиционални комитски носии, со голема посветеност и љубов кон својата татковина, ја продолжуваат традицијата на Илинденците.
Утрово, коњаниците учествуваа во светата богослужба во храмот на Свети Јован Крстител, каде од нашиот собрат, Архимандритот г. Доситеј, беше извршен молитвен благослов за нивниот марш до Крушево. Во својата беседа, Архимандрит Доситеј ги поттикна младите на подвигот и пожртвуваноста на нашите предци, истакнувајќи ја важноста на љубовта кон Бога и Татковината.
„Денес, кога го славиме Свети Никодим Светогорец, кој ја напиша книгата ‘Невидлива Борба’ се потсетуваме дека иако немаме физичко востание како нашите предци, ние сѐ уште водиме борба – внатрешната борба на духот. Свети Никодим нѐ учи дека најголемата битка е онаа во нашето срце и ум. Неговите зборови нѐ потсетуваат дека треба да се бориме против нашите страсти, гревови и слабости, исто како што нашите предци се бореле за слобода. Оваа ‘невидлива борба’ е суштинска за нашиот духовен раст и за нашата врска со Бога,“ изјави Архимандрит Доситеј.
По завршувањето на богослужбата, коњаниците пред Светото Писмо, револвер и кама дадоа заклетва за верност кон револуционерното ослободително дело, истата заклетва што некогаш ја положиле сите членови на Македонската револуционерна организација. Овој чин е симбол на нивната посветеност и решителност да ја одржат живата меморијата за нашата борба за слобода.
Свештената Бигорска Обител има длабоки историски корени во борбата за македонската слобода. Во текот на Илинденското востание, монасите од Бигорскиот манастир активно учествувале во подготвувањето на востанието. Една од најпознатите и најзначајните активности на монасите била изработката на црешовите топчиња, кои се користеле како оружје во борбата. Овие импровизирани топчиња, направени од црешово дрво, биле симбол на иновативноста и решителноста на нашите предци во нивната борба за слобода. Монасите ги изработувале овие топчиња со голема прецизност и вештина, и тие станале важен дел од вооружувањето на Илинденците.
Претседателот на здружението „Бигорски манастир – Патот на Црешовото топче“, г. Манојил Јаковлески, во своето пригодно слово упати посебна благодарност кон нашиот Старец и братството за нивната неуморна родољубива дејност и несебична поддршка за остварување на оваа манифестација.
На пладне, коњаниците го продолжија своето патешествие кон Крушево, каде што на 2 август ќе се одржи централната Илинденска прослава. Овој настан не само што го обединува македонскиот народ, туку и ја поттикнува младината да ја запознае и почитува својата историја и традиција.
Нека ви е честито и од Бога благословено патувањето за нашето славно Крушево, и нека споменот за тоа Крушево и за Востанието, остане засекогаш силно врежан во нашите срца!
