На денешен ден Црквата Божја серадосно го слави споменот на еден од најголемите старозаветни праведници, светиот и славен пророк Илија Тесвитјанин. Илинден, празникот на огнениот пророк, кој со ревноста своја за славата Божја ги поткрепуваше душите од народот израилски, не престанува да биде огнена светлина и за нашите денови, сведоштво дека секое време бара пророци кои нема да молчат пред неправдата и пред отсапништвото, туку со слово и со живот ќе повикуваат на враќање кон живиот Бог.
Светиот Илија, кој живееше и проповедаше во времето на идолопоклонството на царот Ахав и неговата сопруга Језавела, ни е предобраз на вистинскиот борец за вистината и справедливоста. Самиот Бог го избра за Свој глас во тешки времиња. Не е чудно тогаш што во народното предание тој се смета за заштитник од зло и непогоди, бидејќи секогаш стоел на страната на вистината и со сила одозгора се борел против лагата и мракот.
Во светлината на овој празничен спомен, и нашата Бигорска свештена обител со сета благоговејна сериозност и духовна возвишеност го одбележа денот посветен на свети Илија. Торжествено беше отслужен празничниот богослужбен круг, крунисан со Божествена Литургија, на која молитвено се принесе благодарност кон Бога за големиот пророк и за сите сведоци на вистината низ историјата.
Истовремено, дел од нашата монашка заедница, според востановената традиција, водени од љубов кон Лазарополе – селото со длабоки христијански корени, каде што традиционално се празнува Илинден – отслужија Божествена Евхаристија во храмот посветен на свети Георгиј Победоносец, заедно со благочестивиот народ што се беше собрал да Го прослави Бога и Неговиот верен слуга.
Во Бигорскиот Манастир, пак, покрај евхаристиското славење, беше отслужена и свечена доксологија за Татковината – чин на молитвено спомнување и благодарност за сите оние кои животот го положиле на браникот на верата и на честа на нашата татковина Македонија. За сите херои, знајни и незнајни, што го одбранија светото – и народот, и слободата, и крстот Христов.
На овој славен и исполнет со духовна сила ден, монашкото братство на Свештената Бигорска Обител, предводено од Старецот и Епископ Антаниски г. Партениј, им го честита на сите Македонци нашиот најголем национален празник Илинден, како и споменот на светиот пророк Илија, со молитва да го имаме сите неговиот дух – дух на ревност, на вистина, на непоколеблива вера и на храброст во сведочењето на Евангелието.
Нека светиот пророк Илија, кој не виде смрт, туку жив се вознесе на небото, ни биде патеводител кон незаодната светлина на Царството Божјо, нашата небесна Татковина! Амин.
Свети пророче Илија, моли Го Бога за нас!
