Во прекрасниот амбиент на нашата Бигорска свештена обител, каде што вековната традиција на дрворезбата, уметноста и занаетчиството претставува нераскинлив дел од богатото духовно и културно наследство, деновиве се одржа интересна и содржајна стручна презентација посветена на современите технологии и производи за заштита, обработка и нега на дрвото.
Со благослов на нашиот возљубен старец и игумен, епископот Антаниски г. Партениј, во свечениот манастирски синодикон беше претставена производната програма на реномираната германска компанија OSMO Holz und Color GmbH & Co. KG, преку нејзиниот регионален застапник Osmo Adriatic. На презентацијата присуствуваа претставници на повеќе компании и професионалци од областа на дрвопреработувачката индустрија, производството на мебел, како и примената на бои, масла и заштитни премази за дрво.
Стручниот дел го водеше техничкиот претставник на компанијата, г. Томаж, кој ги запозна присутните со карактеристиките и предностите на производите на OSMO, со посебен осврт на современите решенија за долготрајна заштита на дрвените површини, зачувување на нивната природна убавина и продолжување на нивниот век на употреба.
Компанијата OSMO, со традиција подолга од 140 години, е меѓународно препознатлива по своите иновативни системи за обработка и заштита на дрвото, особено по премазите засновани врз природни растителни масла и восоци. Овие производи овозможуваат дрвото да го зачува својот природен изглед и структура, истовремено обезбедувајќи заштита од влага, нечистотии и секојдневно абење. Притоа, особено внимание се посветува на одржливото користење на природните материјали и на нивното правилно одржување.
Целокупната организација на оваа корисна стручна средба беше во режија на компанијата „ЈугоПод“ од Струмица, која придонесе на едно место да се соберат претставници на стопанскиот сектор, со можност за размена на искуства, стекнување нови сознанија и унапредување на професионалната соработка.
За нашата обител, која во својата повеќевековна историја го негувала и го чувала благородното наследство на македонските мајстори, градители и копаничари, ваквите средби имаат и особена симболика. Дрвото, како природен материјал, отсекогаш заземало значајно место во православното црковно градителство и уметност, а бигорскиот иконостас, едно од највеличествените остварувања на македонската резбарска традиција, останува трајно сведоштво за неговата убавина и благородност.
Со благодарност кон организаторите и сите учесници, се радуваме што нашата свештена обител и овојпат беше место на плодотворна средба, размена на знаења и искуства, во духот на почитувањето на традицијата, творештвото и човечкиот труд.
