Денес, кога светата Црква со љубов и благодарност го чествува споменот на преподобната и богоносна мајка наша Параскева Епиватска, светителката на смирението, молитвата и пожртвуваната љубов кон Христа, градот Дебар повторно се исполни со благодатната радост на празничното евхаристиско собрание. Во храмот посветен на оваа голема Божја угодничка, каде што со години се принесуваат молитви и се бара нејзиното небесно застапништво, денешниот празник беше украсен со свечено архиерејско сослужување.
Нашиот високопочитуван надлежен митрополит, Неговото високопреосвештенство г. Георгиј Дебарско-кичевски, во братска љубов и единомислие со нашиот возљубен старец, Неговото преосвештенство, епископот Антаниски г. Партениј, ја отслужи Божествената Евхаристија, принесувајќи ја бескрвната Жртва на благодарноста пред престолот на Севишниот Бог.
На двајцата архиереи им сослужуваа благоговејните свештенослужители: архимандритот Доситеј, јеромонахот Ефросиниј, протопрезвитерот Никола Христоски, дебарскиот презвитер Миле Ангелески, јероѓаконот Порфириј и протоѓаконот Николче Ѓурѓиноски.
Во молитвеното торжество на светата Литургија, околу едниот Жртвеник и едната Чаша Христова, повторно се пројави убавината на црковното единство, во кое сите, архиереи, свештенослужители и верен народ, стануваат едно Тело во Христа, причестувајќи се со Неговата љубов и со надежта на вечниот живот.
Особен духовен украс на денешното празнично собрание беше пригодното пастирско слово на Високопреосвештениот митрополит г. Георгиј, посветено на светлиот спомен на преподобната Параскева. Навистина, животот на оваа славна Христова невеста и денес останува живо сведоштво дека вистинската убавина на човековото постоење се открива во смирението, во чистотата на срцето, во милосрдието и во целосното предавање на Божјата волја. Нејзиниот земен пат, исполнет со подвиг и самоодрекување, станал пат кон небесната слава, а нејзината љубов кон Христа – непресушен извор на утеха и надеж за поколенијата верни што со векови го повикуваат нејзиното свето име.
И навистина, колку е утешно што и денес, среде немирите и искушенијата на нашето време, светителите Божји продолжуваат да нè собираат околу Христа, да нè потсетуваат на нашето вистинско назначение и да ни го покажуваат патот кон Царството што нема крај. Така и ова денешно литургиско торжество во Дебар беше уште една потврда дека Црквата Христова живее од светоста, се крепи со молитвата и се изградува со љубовта.
Нека преподобната мајка наша Параскева, која со своите свети мошти и со многубројните чудеса останува живо сведоштво за Божјата благодат, ги закрилува сите Божји чеда во град Дебар и сите оние кои со вера го повикуваат нејзиното молитвено застапништво. По нејзините свети молитви, Господ да им дарува на сите мир во душите, љубов во срцата и крепост во добрите дела, за и ние, следејќи го нејзиниот светол пример, да станеме вистински сведоци на Христовата љубов во светот.
Преподобна мајко Параскево, моли Го Бога за нас!
