Здравица на Неговото Блаженство Архиепископ Охридски г. г. Стефан
(Во понеделникот на Светиот Дух, 13.06.2022 г., за време на ручекот со Вселенскиот Патријарх, Константинопол)
Ваша Сесветост,
Браќа и избрани за оваа трпеза на љубовта,
Во[1] исто време, и радост и тага ги опфаќа нашите срца. Радост, затоа што „ја видовме вистинската светлина, го примивме Духот небесен“, овде, во средиштето на Православната Црква. А тага, затоа што по толку убави денови попладнево си заминуваме од Вашето присуство.
Доаѓајќи наваму, патувавме со различни чувства: со нестрпливост, со мечта, со надеж, со страв, со неизвесност, со колебливост и сл. Но, сега сето тоа го оставивме овде, го пуштивме низ Златниот Рог и во Босфорот, за брановите да го однесат далеку. А ќе заминеме со радост вистинска, со копнеж за Црквата, љубов за единството, со восхит за Мајката Црква Константинополска, којашто толку мудро знае да го заштитува она што ѝ го завештале Соборите и Преданието, и со тоа да ни добротоври на сите нас. Ете, оттаму ги нацрпивме смелост, духовното укрепување, просветлението; се напоивме од тој извор на љубов кон Црквата – од љубовта што ја покажувате Вие, Ваша Сесветост; зедовме сила од Градот и бевме поткрепени од Духот Свет.
И сега, Владико свет, си заминуваме на истите места, во Охрид кој блеска од древност и блискост со Великата Црква, си заминуваме во нашата Татковина, чиишто епархии пред нецел век беа територија на оваа освештена Црква. Но и да не беше така, Вие, веруваме, ќе се однесувавте и ќе нè пресретневте со истата грижа и со истата љубов, зашто Мајката Црква знае само да љуби и да милува.
Сакам, уште еднаш, најсрдечно да Ви се заблагодарам за сè! За Патријаршискиот и Синодален Акт, со кој се истакнува многу доброто искуството на Црквата и на нејзините векови; за гостољубието, иако не се чувствуваме како гости, бидејќи сме во татковскиот дом на сите Православни; за Вашата грижа, за Вашето благородство, за Вашиот етос, за Вашите трудови…
Ви благодариме за тоа што сте, Ваша Сесветост, и за тоа што молчаливо сите нас нè поучувате во она што е најспасоносно – целосно посветни на Бога! Со ентузијазмот и со чувствата на првите Христијаните, со молитва и со литургиски живот, ги држиме нашите очи вперени кон Вашето сесвештено лице. Впрочем, подобно на она кое го зборува апостолот: …Беа истрајни во учењето на апостолите, во заедничкиот живот, во прекршувањето на лебот и во молитвите[2].
Ви благодарам од името на сите свети членови на нашиот Синод и, секако, Ве очекуваме да ни дојдете во Охрид и во нашата богоблагословена земја, за да го почувствувате и Вие нашето авраамово гостопримство и да ја видите на дело нашата целосна оддаденост, па и таму да Ви ја покажеме сета наша благодарност кон Вас и кон Мајката Црква!
На многаја лета!
[1] На здравицата на ручекот од последниот ден од посетата на Константинопол, 13. 06. 2022 г.
[2] Дела 2, 24
