Посета на нашиот манастир

Денес кога светата православна Црква молитвено си спомнува за светиот апостол Јаков Брат Божји, во посета на нашиот манастир пристигна г-дин Зоран Теофилоски, заменик претседател на Апелациониот Суд во Гостивар и г-дин Дејан Бошковски, Генерален директор на ЕЛЕМ. Гостите ја искористија можноста што им ја подари овој убав есенски ден да ги видат сите убавини на величествената Бигорска Обител со своите импозантни конаци, возвишени кули, живописни чардаци и традиционални одаи, прекрасни споменици на боговдахновената византиска архитектура. Притоа не изоставија духовно да се насладат од благодатта на Бигорскиот храм и да се поклонат на светите мошти на апостол Јаков, чиј спомен денес го празнуваме. А меѓу другото, игуменот на светата Бигорска обител, нашиот старец, архимандрит Партениј, им ги покажа и завршните работи од обновата на опожарениот Горни Палат. Г-динот Зоран му подари на нашиот игумен една икона со ликот на Мајката Божја за здравје на својата фамилија.