Посета на Архиепископот во Бигорски со гости од Романија

Во пресрет на денот кога го славиме споменот на преподобна Макрина, нашиот многупочитуван Архиепископ, Неговото Блаженство, г. г. Стефан, ни направи голема радост, доаѓајќи ни во посета на нашите два манастири, воден од желбата да се запознае со текот на работите околу завршната фаза на возобновата на Бигорскиот манастир. Радоста ни ја зголемија и неговите ценети гости од Романија, протосингелот Климент, игумен на манастирот Сланик, посветен на Рождеството на Пресвета Богородица, и старица Херувима со дел од своето сестринство од манастирот Аниноаса, посветен на св. Николај Мирликиски Чудотворец. Обата манастири се наоѓаат во епархијата Аргешулуи ши Мускелулуи, со која раководи архиепископот Калиник. Сестрите од Романија заедно со својот духовник, о. Климент, кои се наоѓаат во неколкудневна посета на нашата земја, со големо задоволство се запознаа со нашиот старец, архимандрит Партениј, како и со убавините на нашите два манастири, и со братството и сестринството ги споделија своите впечатоци за срдечноста и гостопримството на нашиот народ. Неговото Блаженство, г. г. Стефан, пак, ја искажа својата радост поради присната соработка со манастирите од гореспомнатата епархија, за која изрази надеж дека во иднина уште повеќе ќе се продлабочува.