Во пресрет на главната манастирска слава на Бигорската свештена обител, посветена на Усекновението на чесната глава на Светиот славен Пророк, Претеча и Крстител Господов Јован, нашиот небесен закрилник, молитвен застапник и вечен домаќин на ова древно Светилиште, со особена духовна радост ги покануваме сите благочестиви верници и почитувачи на Светиот Претеча да се присоединат кон празничното торжество.
Овогодишното чествување ќе биде збогатено со еден особено значаен и трогателен духовен настан за нашата Обител: за време на празничното бдение, на кое молитвено ќе претстои нашиот почитуван митрополит Дебарско-кичевски, Неговото високопреосвештенство г. Георгиј, три нови монашки рожби на нашиот возљубен старец и игумен, Неговото преосвештенство епископот Антаниски г. Партениј, ќе бидат облечени во светиот ангелски монашки образ. Така, радоста на патронот на Обителта ќе се соедини со радоста на новото монашко принесување – со доброволното предавање на три млади души во целосна служба на Христа и на Неговата Црква, под молитвеното покровителство на свети Јован Крстител.
Особена чест и радост за празникот ќе претставува и учеството на прочуениот хор по источно-православно пеење „Свети Јован Кукузел“ од Тирана, Р. Албанија, кој ќе пристигне во нашата Обител со благослов на Неговото Блаженство, Архиепископот на Тирана, Драч и на цела Албанија, г. г. Јован. Заедно со хорот при Бигорското братство, гостите од сестринската Православна Црква на Албанија ќе го украсат празничното бдение и богослужението со древното византиско црковно пеење, претворајќи го празникот и во прекрасно сведоштво за православното единство и братољубие во Христа.
Четврток, 10 септември 2026
16:00 ч. – Мала вечерна богослужба
18:30 ч. – Повечерие
19:00 ч. – свечен пречек на архиереите и почеток на празничното сеноќно бдение
20:00 ч. – чин на монашење на тројца нови браќа на Бигорската обител
По монашењето продолжува празничното бдение.
22:00 ч. – празнична Утрена богослужба
00:00 ч. – Прв час
Празничните богослужби ќе бидат разубавени со пеењето на хорот при Бигорското братство и на византискиот хор „Свети Јован Кукузел“ од Тирана.
Петок, 11 септември 2026
Усекновение на чесната глава на Свети Јован Крстител
08:00 ч. – Трет и Шести час
08:30 ч. – свечен пречек на архиереите
08:45 ч. – почеток на светата архиерејска Златоустова Литургија
16:00 ч. – Ктиторска вечерна богослужба
Славното Бигорско светилиште, коешто низ вековите било и останало гордост и пофалба на нашите предци, столб на нивната православна вера и духовно прибежиште на безброј поколенија, и денес со истата апостолска ревност продолжува да сведочи за евангелската Вистина и да ги собира своите духовни чеда околу светињата на Христовиот Претеча.
Особено оваа година, празничната радост добива уште подлабока смисла. Пред светиот олтар Божји, пред чудотворната Бигорска икона и светите мошти на Чесниот Претеча, во присуство на архиереи, монаштво, свештенство и верен народ, тројца нови браќа ќе го положат својот живот пред Христа во монашкиот подвиг. Нивното принесување е радост не само за нивниот духовен отец и за братството, туку и за целата Црква, зашто секое ново монашко „да“ кон Бога е сведоштво дека и во наши дни е жив оној евангелски и апостолски повик кон целосно предавање на срцето на Господа.
Во истата таа духовна полнота, присуството на хорот по источно-православно пеење „Свети Јован Кукузел“ од Тирана, Албанија, со благослов на Блаженејшиот Архиепископ г. г. Јован, ќе внесе уште една светла димензија во славата: братско сведоштво дека православната вера, молитвата и свештеното предание ги надминуваат сите граници и ги соединуваат народите во едната Христова Црква. Со нив и со нашите браќа псалти, древните химни кон Светиот Претеча ќе се вознесуваат во Бигорски како заедничка молитва и благодарност.
Затоа, со особена чест и љубов, во името на Христовиот Пророк и Крстител, ги повикуваме сите благочестиви Христијани, поклоници и почитувачи на свештеното дело на свети Јован да се присоединат кон неговото големо торжество.
Да дојдеме пред неговата чудотворна икона и неговите свети мошти, да му ги принесеме своите молитви, своите благодарности и своите надежи, уверени дека оној кого Самиот Господ го нарече „најголем меѓу родените од жена“, со особена благодат ги посетува и закрилува оние што со вера и љубов го чествуваат неговиот спомен.
Молитвите на светиот славен Пророк, Претеча и Крстител Господов Јован да бидат со сите нас! Амин!
