Со ескалирањето на протестите во Оромија, Етиопија, сѐ повеќе се зголемува и бројот на христијански жртви. Последната бројка зборува за околу 90 мртви, повеќе од 300 повредени, многу христијански домови запалени, а бројот на Христијаните што се принудени да го напуштат својот дом одамна ја помина бројката од неколку десетици илјади. Во тоа страшно безредие кое започна со протести против Владата, Христијаните се на најголем удар од локалното население, кое не бира средства за чистка на религиозна основа, а полицијата и државните органи не прават ништо за да го спречат тоа.
Во Оромија денес не престануваат нападите и заплашувањата против христијанското население. Според секретаријатот на западните епархии, жртвите не можат да добијат ни соодветна медицинска помош, и покрај тоа што од Претстојателот на овие епархии беше побарана интервенција од Црвен крст за помош на жртвите. Најголем број на пострадани се жители на главниот град Адис.
Во длабока тага за своите чеда кои што страдаат во овој регион, Претстојателот на Етиопската црква Абун Матијас, во својата потресна беседа изјави:
„Мои деца! Јас сум ви духовен татко. Јас сум вашиот пастир. Но, не можев да ве заштитат од колежот, не можев да ве спасам од смртта. И немам способност да ги приведам убијците пред правда. Во рацете немам оружје туку крст. Простете ми, јас ве учев да велите ‘мир’, а оние што не знаат за мир ве мачеа. Бог нека гледа и нека биде Судија“.
Во апелот за помош што го упати Етиопската Црква е наведено: „Етиопската црква испраќа апел до сите христијански цркви, до сите верни и поддржувачи и добронамерници, да помогнат со својата хуманитарна помош на оние кои што се гонети и секојдневно претрпуваат напади поради својата вера; за оние кои се принудени да ги напуштат своите домови и да се засолнат во црквите, особено бремените мајки и деца. Ве молиме да ни направите добрина и да ни ја понудите својата финансиска помош и поддршка. Помагајќи и споделувајќи ја оваа порака, вие ја подавате својата рака на страдалната црква која што трпи прогонство. Нека Господ на нашите татковци ни помогне, нека ги прими нашите молитви и добри дела и нека нѐ заштити од беззаконието, од духовната смрт и беда на душата“.
Сите што имаат желба да помогнат можат да донираат на следнава страница:
https://www.gofundme.com/f/support-faithful-and-churches-in-rural-eotc
