Сакајќи да се причестиме со Божествената Пасха, која не од Египет, а од Сион доаѓа, со покајание да го отфрлиме гревовниот квасец, со умртвување на страстите бедрата да ги препашаме; нозете да ги украсиме со обувки, кои што ќе нѐ бранат од секакво дело лукаво, и да се утврдиме со палката на верата; да не ги подржаваме непријателите на крстот Господов, кои му служат на стомакот, но со пост да Го следиме Спасителот на душите наши, Кој победата над ѓаволот ни ја покажа.
![](http://bigorski.org.mk/wp-content/uploads/2020/01/arhimandrit-partenij-bigorski-manastir-ikona-arhangel-mihail.jpg)
Усвојувајќи го целосно духот на покајанието што ни го предлага Великата Четириесетница и правејќи го нашиот подвиг во смирение, без некоја особена тешкотија ќе се отвори патот на спасението за нас. Така, на која-годе Богослужба од овој чудесен период се затекнеме во храмот, било да е тоа Полуноќницата со Утрената и часовите, или Изобразителната со Вечерната, или Великото Повечерие, а особено Преждеосвештената Литургија, ќе сфатиме за што станува збор и ќе добиеме полза. Сето она за што се пее или чита или прави во светиот храм, ќе го чувствуваме како да е осмислено посебно за нас, како да е напишано токму за нас лично, како некој да влегол во нашиот пулс, како некој да ѕирнал длабоко во потребите на нашата душа. И ќе почувствуваме дека Бог толку силно нè љуби, дека примислува за нас, дека толку многу ни се приближува, дека толку многу го сака нашето спасение, што е доволно само да ја запазиме заповедта: покајте се. И како што ќе почнеме да се каеме, Он ќе ни дава уште поголемо покајание, ќе ни дава милост, така што ќе сфатиме што значи прошка на гревовите: Бог те прима, те спасува…
(Извадок од поука за Великиот Пост, искажана од Старецот, Архимандрит Партениј, на група верници)