Како тивка небесна прегратка, исполнета со љубов, милост и утеха, и оваа година се распростре благодатниот Покров на Пресветата Богородица над живописното Ростуше и над сиот рекански крај. Во сечесниот храм посветен на Царицата Небесна, каде што нејзиното свето име непрестајно се воспева и славослови, денешниот празник ги собра верните чеда на Црквата во едно молитвено семејство, под закрилата на Онаа која никогаш не ги остава нечуени воздишките на своите деца.
Она што некогаш во Влахернскиот храм во Цариград му беше откриено на Светиот Андреј Јуродив – чудесното видение на Пресветата Дева како го простира својот чесен Покров над собраниот народ – и денес останува жива вистина и неисцрпна утеха за секое христијанско срце. Зашто мајчинската љубов на Богородица не познава граници, ниту престанува со текот на вековите, туку постојано ги прегрнува сите кои со вера и надеж прибегнуваат кон нејзиното застапништво.
Во оваа светла празнична радост, нашиот возљубен старец, епископот Антаниски г. Партениј, заедно со браќата од нашата свештена обител, отслужи Божествена Евхаристија во прекрасниот ростушки храм, принесувајќи молитви и благодарење кон Бога за сите Негови добродетелства и за неизмерната мајчинска грижа на Пречистата. Во светотаинската благодат на богослужението, меѓу молитвените возгласи и благозвучните песнопенија, срцата на присутните се издигнуваа кон небесата, таму каде што Мајката Божја непрестајно се застапува пред престолот на својот Син за спасението на светот.
И така, уште еднаш, храмот на Пресветата во Ростуше стана место на средба меѓу небесната милост и човечката благодарност, прибежиште на душите и сведоштво за благодатното присуство на Богомајката во животот на верниот народ. А над селото, над планините и долините на славна Река, како невидлив благослов останува да се простира нејзиниот свет Покров, повикувајќи нѐ сите кон вера, смирение, љубов и надеж во Господа.
Пресвета Владичице Богородице, покриј нѐ со својот чесен Покров, сочувај го нашиот народ во мир и благочестие и не престанувај да се молиш за нас пред твојот Син и Бог наш!
