Свештениот спомен на преподобниот и богоносен отец наш Наум Охридски Чудотворец, една од најсветлите фиданки на светото Кирилометодиевско евангелско семе, во Бигорската свештена обител беше молитвено и достоинствено одбележан.
Денеска, со литургиското торжество началствуваше нашиот возљубен старец и смирен поклоник на делото на Преподобниот, Неговото преосвештенство епископот Антаниски г. Партениј, кој, заедно со браќата свештенослужители и во присуство на притекнатите верници, благодарствено и молитвено го прослави оној кој со своите живот, подвиг и светост ги озари овие краишта и стана непресушен извор на благодатна утеха за поколенијата.
Преподобниот отец наш Наум, верен ученик на светите рамноапостолни браќа Кирил и Методиј и соподвижник на светиот Климент Охридски, се покажа како тивок, но силен благовесник на Христовата вистина; како монах со ангелско житие, како учител на народот, како исцелител на страдалниците и како молитвен застапник на сите кои со вера пристапуваат кон него. Во неговата личност Црквата гледа не само голем просветител од минатото, туку и жив спроводник на Божјата благодат, која и денес дејствува преку светителите како преку светилници запалени од незалезната светлина Христова.
Особено за нашите краишта, споменот на свети Наум е празник на духовното паметење и на благодарноста. Зашто преку неговото свето дело, заедно со она на свети Климент, словото Божјо се вкорени во срцето на нашиот народ, и донесе плодови на молитва, писменост, култура и спасоносен пат кон Царството Небесно.
Во тивката и благодатна радост на денешната Литургија, Бигорската обител ја продолжи врската со свештеното охридско предание, со онаа непресушна духовна река што извира од подвигот на нашите просветители и чудотворци, напојувајќи ја Црквата со вера, надеж и љубов. Евхаристиското собрание стана благодарствено сеќавање, но и молитвен повик да го чуваме наследството на светиите со живот достоен за нивните жртва и љубов.
По молитвите на преподобниот Наум Охридски Чудотворец, Господ да ја укрепи светата Црква, да го запази народот во верата православна, да ги благослови нашите монашки обители и да им подари мир, здравје и духовна радост на сите кои со љубов го чествуваат неговиот свет спомен.
Преподобен оче Науме, охридски чудотворче и молитвенику пред престолот Господов, моли се и за нас!
