По повод светлите велигденски празнувања, со благослов на нашиот старец, Неговото преосвештенство епископот Антаниски г. Партениј, денес нашиот собрат, архимандритот Доситеј, ги посети нашите драги пријатели и сограѓани од Дебар, носејќи им велигденско јајце – симбол на животот, победата и надежта што Христовото Воскресение ја дарува на светот.
Во духот на оваа празнична радост, архимандритот Доситеј оствари средба и со градоначалникот на Општина Дебар, г. Фисник Мела, при што беа разменети честитки и искрени благопожелби за мир, здравје и напредок на сите жители на градот.
Оваа посета уште еднаш го потврдува духот на взаемна почит, разбирање и добрососедство што со векови се негува во Дебар – град во кој различностите не се пречка, туку богатство, а заедништвото е темел на соживотот. Во тие вредности, кои се длабоко вкоренети во нашата традиција, се огледа вистинската сила на заедницата и надежта за иднината.
Нека радоста на Воскресението Христово ги исполни срцата на сите луѓе со љубов, мир и добрина. Христос Воскресе!
